Зейнетақы мен әлеуметтік төлемдерді тағайындау: Шымкентте мемлекеттік қызмет көрсету сапасы арттырылуда

Шымкент қаласы бойынша зейнетақы мен әлеуметтік жәрдемақыларды тағайындау үрдісі мемлекеттік органдардың басты міндеттерінің бірі болып табылады. Осы орайда, «Азаматтарға арналған үкімет» КЕАҚ бірлескен жоспарына сәйкес, бірқатар маңызды шаралар жүзеге асырылуда. Мемлекеттік қызмет көрсету сапасын арттыру, азаматтардың өтініштеріне уақытылы жауап беру және халық арасында заңнамаға енгізілген өзгерістерді түсіндіру жұмыстары ауқымды түрде атқарылып жатыр.

2024 жылдың бірінші жартыжылдығында әлеуметтік төлемдер мен зейнетақыны тағайындауға өтініш берген 34 772 азаматтың құжаттары тексерілді. Өтініш берушілердің құжаттарын растау үшін уәкілетті ұйымдарға 26 сұраныс хат жолданған. Әрбір өтініштің дұрыстығын тексеру әлеуметтік төлемдерді заңды түрде тағайындаудың басты кепілі екені белгілі. Бұл іс-шара зейнетақы және әлеуметтік жәрдемақыларды дұрыс әрі уақтылы тағайындауға мүмкіндік береді.

Сондай-ақ, бөлім мамандары 138 азаматтың арыз-шағымдарын қарап, ТМД елдерінен келген 798 сұраныс хаттарға жауап берген. Бұл хаттарға жауап беру заңмен белгіленген мерзімдерде жүзеге асырылған. Азаматтардың жеке сұрақтары бойынша қабылдау жұмыстары да тұрақты түрде жүргізіліп отыр. Әлеуметтік қызмет көрсету сапасын жақсарту мақсатында ХҚКО бөлімдері мен әлеуметтік сала мекемелері арасында 6 семинар-кеңес ұйымдастырылды. Мұндай шаралар азаматтарға қызмет көрсету барысында туындайтын мәселелерді жедел шешуге бағытталған.

Зейнетақы мен әлеуметтік төлемдерге қатысты өзгерістер мен толықтыруларды халыққа жеткізу мақсатында бұқаралық ақпарат құралдарында ақпараттық-түсіндіру жұмыстары да жүргізілуде. Осы кезеңде мамандар бір рет жергілікті телеарналарда хабарға қатысып, екі рет газеттерде мақала жариялады. Бұл халықты ақпараттандырудың маңызды құралы болып табылады, себебі заңнамалық өзгерістер туралы ақпараттың дер кезінде жеткізілуі азаматтардың әлеуметтік құқықтарын қорғауға көмектеседі.

2024 жылдың 1 қаңтарынан бастап, еңбек жағдайлары зиянды жұмыстармен айналысатын азаматтарға арнаулы әлеуметтік төлемдер тағайындау тәртібіне өзгерістер енгізілді. Осыған орай, арнайы кестеге сәйкес, 18 мекемеде қызметкерлермен кездесу өткізіліп, түсіндіру жұмыстары жүргізілді. Бұл іс-шаралар азаматтарға әлеуметтік кодекске енгізілген өзгерістер туралы толық ақпарат беріп, олардың құқықтары мен міндеттерін түсінуге көмектесті.

Мұндай іс-шаралардың тиімділігін көрсететін тағы бір мысал – Абай аудандық ХҚК орталығы мен Қаратау ауданы бойынша Мансап орталығында өткен «Ашық есік күні». Бұл шара барысында зейнетақы мен әлеуметтік төлемдерді тағайындау тәртібі түсіндірілді. Қоғамға ашық және қолжетімді болу принципі әлеуметтік қызмет көрсетудің басты талаптарының бірі болып табылады.

Әлеуметтік кодекске енгізілген өзгерістер аясында атқарылып жатқан жұмыстардың нәтижесінде 2024 жылдың 1-ші жартыжылдығында 73 азаматқа арнайы кәсіптік жәрдемақы тағайындалды. Бұл көрсеткіш алдағы уақытта да ұлғаятынына сенім бар, себебі мемлекеттік қызмет көрсету сапасын арттыруға бағытталған іс-шаралар үнемі жаңартылып отырады.

Жалпы алғанда, зейнетақы мен әлеуметтік төлемдерді тағайындау саласында жүргізіліп жатқан ауқымды жұмыс мемлекеттік қызмет көрсетудің тиімділігін арттыруға және азаматтардың сенімін нығайтуға бағытталған. Бұдан бөлек, заңнамалық өзгерістер мен толықтырулар бойынша ақпараттандыру шараларының белсенді жүргізілуі азаматтардың құқықтық сауаттылығын арттыруға ықпал етеді. Шымкент қаласындағы әлеуметтік сала қызметкерлері бұл бағытта нәтижелі жұмыстар атқаруда, бұл халықтың әл-ауқаты мен өмір сүру деңгейін жақсартуға мүмкіндік береді.

Аталған іс-шаралардың барлығы халыққа уақытылы әрі сапалы қызмет көрсету мақсатында жүзеге асырылып, мемлекет пен қоғам арасындағы сенімді нығайтуға бағытталған маңызды қадамдар екені сөзсіз.