Кентауда жаңа зауыттар іске қосылып, өңір экономикасының жаңа өсу нүктелері қалыптасуда

Түркістан облысында экономиканы әртараптандыру, өндірістік әлеуетті арттыру және өңірдің экономикалық тұрғыдан өзін-өзі қамтамасыз ету мүмкіндігін күшейту бағытында ауқымды жұмыстар жүргізілуде. Инвестиция тарту, жаңа өндіріс орындарын ашу, отандық өнім көлемін ұлғайту және экспортқа бағытталған кәсіпорындарды дамыту – осы саясаттың негізгі басымдықтарының бірі.

Бұл бағыттағы жұмыстардың нақты нәтижесі Кентау қаласындағы «Turan» арнайы экономикалық аймағында көрініс тапты. Мұнда «Kentau Cable Industries» компаниялар тобы жүзеге асырған екі жаңа өндіріс орны – жоғары жылдамдықты интернет желілеріне арналған оптикалық кабель шығаратын «Kentau Cable Industries» зауыты мен электр құрал-жабдықтарына арналған металл шкафтар өндіретін «ElectroCore» кәсіпорны ресми түрде іске қосылды.

Жаңа зауыттардың ашылуы Кентаудың өндірістік әлеуетін күшейтіп қана қоймай, Түркістан облысының экономикасын әртараптандыруға да мүмкіндік береді. Бұған дейін негізінен дәстүрлі өндіріс салаларымен танылған қалада жаңа технологияға негізделген кәсіпорындардың бой көтеруі экономиканың жаңа бағыттарға бет бұрғанын көрсетеді.

Түркістан облысының әкімі Нұралхан Көшеров жаңа өндірістердің өңір үшін маңызын атап өтті. Оның айтуынша, өндірісті дамыту, жаңа технологияларды енгізу, шикізаттық экономикадан терең өңдеуге көшу және тұрақты жұмыс орындарын ашу – экономикалық өсудің маңызды шарттары.

– Кентау қаласында жоғары жылдамдықты интернет желілеріне арналған кабель және электр құрал-жабдықтарына арналған металл шкафтар өндіретін заманауи зауыттардың іске қосылуы өңіріміздің өндірістік әлеуетін арттырып, экономикалық дамуына серпін береді. Қос кәсіпорында 200-ге жуық адам жұмыспен қамтылады. Бұрыннан өндіріс қаласы ретінде танылған Кентаудың жаңа тынысы ашылып отыр. Біз өндірісті дамыту бағытындағы жұмыстарды жалғастыра береміз, – деді облыс әкімі.

«Kentau Cable Industries» ЖШС жүзеге асырып отырған жобаның құны 1,7 млрд теңгені құрайды. Кәсіпорын жылына 33 мың шақырым оптикалық кабель және 12 мың шақырым микротүтік пакеттерін өндіруге қауқарлы. Зауытта 100-ге жуық адам тұрақты жұмыспен қамтылады.

Кәсіпорында өнім шығарудың толық өндірістік циклі жолға қойылған. Автоматтандырылған өндірістік желілер бағдарламалық басқару жүйелерімен жабдықталған. Технологиялық шешімдер Siemens, Bosch, ADVANTECH, Panasonic секілді әлемдік жетекші компаниялардың компоненттік базасына негізделген.

Оптикалық кабель өндірісінің іске қосылуы өңірдің цифрлық инфрақұрылымын дамытуға қажетті өнімді ішкі нарықта өндіруге мүмкіндік береді. Бұл өз кезегінде сырттан жеткізілетін өнімдерге тәуелділікті азайтып, қазақстандық тауарлардың үлесін арттыруға ықпал етеді. Сонымен бірге өндірістің технологиялық деңгейінің жоғары болуы өнім сапасын халықаралық талаптарға жақындатуға жол ашады.

Екінші жоба – «ElectroCore» ЖШС. Кәсіпорын электр құрал-жабдықтарына арналған металл шкафтар шығарады. Жобаға 1,5 млрд теңге инвестиция тартылған. Зауыттың жылдық өндірістік қуаты 12 мың дана өнімге жетеді. Мұнда да 100-ге жуық жаңа жұмыс орны ашылған.

Электр жабдықтарына қажетті өнімдердің жергілікті жерде өндірілуі құрылыс, энергетика және өнеркәсіп салаларындағы кәсіпорындардың сұранысын отандық өнім есебінен қамтамасыз етуге мүмкіндік береді. Осылайша, жаңа өндірістер бір-бірімен сабақтас салалардың дамуына серпін беріп, өңірдегі өндірістік кооперацияны күшейтеді.

Кәсіпорындардың басшылығы өндірісті кезең-кезеңімен кеңейтуді, өнім түрлерін көбейтуді және жаңа жұмыс орындарын ашуды жоспарлап отыр. Негізгі мақсаттардың бірі – ішкі нарықтағы сұранысты сапалы қазақстандық өніммен өтеу және экспорттық әлеуетті арттыру.

Бұл ретте инвестиция тарту өңір экономикасының өсуіне ғана емес, оның сыртқы нарықтарға шығу мүмкіндігін кеңейтуге де ықпал етеді. Өнім көлемі мен сапасы артқан сайын Түркістан облысының кәсіпорындары өңіраралық және халықаралық сауда-экономикалық ынтымақтастыққа белсенді қатыса алады. Қазақстандық тауарлардың бәсекеге қабілеттілігін арттыру үшін өндірісте заманауи технологияларды қолдану, халықаралық стандарттарға сәйкес сапа жүйесін қалыптастыру және экспорттық нарықтардың талаптарын ескеру маңызды.

Мемлекеттік қолдау бұл үдерістің маңызды тетігі саналады. «Turan» арнайы экономикалық аймағы сияқты өндірістік алаңдардың дамуы инвесторларға қажетті жағдай жасауға, жаңа жобаларды орналастыруға және бизнестің өндірістік шығындарын оңтайландыруға мүмкіндік береді. Мемлекет пен жеке сектордың өзара іс-қимылы арқылы жаңа кәсіпорындар іске қосылып, өңірге капитал мен технология келуде.

Кентау қаласында бұдан бөлек өндіріс, ауыл шаруашылығы, туризм және басқа да салалар бойынша бірқатар инвестициялық жобалар жоспарланған. Бұрынғы кәсіпорындардың ғимараттарын қайта жаңғыртып, оларды жаңа өндірістерге бейімдеу де қолда бар инфрақұрылымды тиімді пайдалануға мүмкіндік береді.

Жалпы, Кентаудағы екі жаңа зауыттың іске қосылуы Түркістан облысының экономикалық даму стратегиясындағы маңызды қадам. Жаңа өндірістер инвестиция тартуға, жұмыс орындарын көбейтуге, ішкі нарықты отандық өніммен қамтуға және экономиканың бір ғана салаға тәуелділігін азайтуға ықпал етеді. Ал өндіріс көлемінің ұлғаюы мен өнім сапасының артуы ұлттық экспорттаушылардың сыртқы нарықтағы мүмкіндігін кеңейтуге негіз болады.

Осылайша, Кентауда қалыптасып жатқан жаңа өндірістік орта өңір экономикасының өзін-өзі қамтамасыз ету деңгейін арттырып, Түркістан облысын технологиялық, инвестициялық және экспорттық әлеуеті жоғары өңірлердің біріне айналдыруға бағытталған ұзақ мерзімді экономикалық саясаттың нақты нәтижесіне айналып отыр.