Әл-Фараби ауданының жол құрылысы және инфрақұрылымын дамыту: 2024 жылға арналған жоспар мен нәтижелер

Әл-Фараби ауданында жол құрылысы мен жөндеу жұмыстары 2024 жылы ерекше қарқынмен жүргізілуде. Қалалық инфрақұрылым мен тұрғындардың қолайлы өмір сүру жағдайын жақсарту мақсатында аудандағы көше және орамішілік жолдарға асфальт жабындысын салу, аяқ жолдар жасау және ағымдағы жөндеу жұмыстарын іске асыру қолға алынған.

Әл-Фараби ауданының аумағында ұзындығы 260 шақырымды құрайтын 390 көше, даңғыл және өткел орналасқан. Бұл көшелердің көпшілігі – 366 көше (245 шақырым) асфальтталған болса, қалған 24 көше (15 шақырым) тас жол күйінде қалуда. 2024 жылы қалалық жолаушылар көлігі және автомобиль жолдары басқармасы арқылы келесідей жұмыстар атқарылды: 32 көшеге асфальт жабындысы салынды, олардың ішінде 19 орталық көше және 276-орамдағы 13 ішкі көшелер жаңа асфальт қабатымен қамтамасыз етілді.

Жыл қорытындысы бойынша, асфальтталған көшелер саны аудандағы жалпы жолдардың 94%-ын құрап, 13,209 км асфальт төселді. Бұл көрсеткіш аудан тұрғындарының ыңғайлы және қауіпсіз қозғалысына жағдай жасап, ауданның жалпы инфрақұрылымын жақсартуға ықпал етуде.

Тұрғындардың сұранысын ескере отырып, «Халық үніне құлақ асатын мемлекет» тұжырымдамасы аясында, ішкі орам көшелері мен көпқабатты тұрғын үй аулаларына аяқ жол салу жұмыстары жүргізілуде: 2024 жылы аудан бойынша жалпы көлемі 13 271 м² болатын 41 ішкі орам көшелері мен тұрғын үй аулаларында аяқ жол салу жоспарланған. Қазіргі уақытта 26 мекен-жайда аяқ жолдар толық салынған, ал қалған жерлерде жұмыстар жалғасуда. Аяқ жолдардың болуы тұрғындар үшін қауіпсіз қозғалыс аймағын қамтамасыз етеді, әсіресе балалар мен егде жастағы адамдарға қолайлы жағдай жасайды.

Аудан бойынша көпқабатты тұрғын үй аулаларына қатысты асфальттау жұмыстарында да елеулі жетістіктер бар: 120 аулалық жолға 1 100 тонна асфальт төселеді және ағымдағы жөндеу жұмыстары жүргізіледі. Бұл жұмыстар аулалардағы жол сапасын жақсартуға, тұрғындар үшін қолайлы және қауіпсіз орта құруға бағытталған.

Әл-Фараби ауданының инфрақұрылымын дамытуға арналған бұл шаралар ауданның жалпы көркін жақсартуға, көлік пен жаяу жүргіншілерге қолайлы орта құруға және тұрғындардың өмір сүру сапасын арттыруға оң ықпалын тигізеді.